1Th 2 | DOB | STEP | Gosemao, ni'atu wamwalamwalatoni 'aene lowa 'ima ayausa 'emiya nigeya 'aayaayausa daita, ta esi ma uwana.

1 Thessalonians 2

Paulo 'ina paisewa Tesalonaika 'enaya.

1 Gosemao, ni'atu wamwalamwalatoni 'aene lowa 'ima ayausa 'emiya nigeya 'aayaayausa daita, ta esi ma uwana. 2 Wanuwa'i'isi wate 'aene me Pilipai lowa sibubuna geyogeyoiyema ga sigie omayamayaema, ta tuwa tuga Yaubada 'igie 'atepatuma ga tetelina bobo'ana 'asimanena 'emiya 'anabwa'ayoi tomota sietalauwalema, ta 'aloguguya 'emiya, 3 nigeya kaboega, nai nigeya ona to'umalina 'enega, ta esi ona'ai'aila 'enega. 4 Manuna 'ima paisewa gete Yaubada 'itagwala 'emaya be tetela bobo'ana 'asimana apwese, 'enega 'ima simana nina nigeya to'ase tomota nuwanuwadi, ta esi to'ase Yaubada nuwanuwana. Manuna nuwanuwa nidi 'atemaya simiyami, nai bobo'adi, nai to'umalidi, Yaubada taunamo 'imwalamwalatoni.

5 Ta Wamwalamwalatoni lowa 'awai 'emiya nigeya ma ima ona dibidibidi, ta Yaubada wate 'imwalatonina 'aene nigeya 'aonaona 'awa yalayala 'emiya be 'aene 'imi gwegweyao 'a'ewadi. 6 Ta wate yage nidi 'aguiguinuwedi matamiya ta wate mali tomota matadiya nigeya tauma 'ama tupu manuna, ta esi 'omi 'ami lema manuna. Ona'ai'aila, 'abo'ama Keliso 'ana tosimanao, 'enega 'ilobwenema be 'aetoloina 'emiya, ta nigeya. 7 'Ima bubuna 'emiya ma ima oonuwa, nadigega waine natunao 'ediya ma ina oonuwa. 8 Ta nuwama wa'ewena, 'enega ma ima 'atetagwala 'emiya Yaubada tetelina 'asimanena, ta wate 'abo'ama taumamo 'atagwalema, ga 'aegosigosiyana 'ai'ailemi.

9 Gosemao, wanuwa'i'isi lowa 'ima paisewa 'emiya, 'asiyata be boiboi 'ediya 'apaipaisewa sinabwana, ga 'enega taumamo 'ae'enima, ta wate Yaubada tetelina 'asimanena 'emiya, manuna geya nuwama 'ami mwau 'asa'u 'ama 'ita'i'ita manuna. 10 'Omi Keliso 'ana toemisao, ta 'abo'ama 'ima bubuna 'emiya wamwalatonina, ta Yaubada wate 'imwalatonima 'aene 'esasema, ta palupaluma, ta bobo'ama. 11 Manuna maibo'ami 'a'ita'i'isimi, 'atuwa nadigega tai natunao 'i'ita'i'ita 'esedi, 12 ta wate 'aloguguyemi be 'agiepa'alimi, ta wate 'aeonemi be 'aene wada bubuna bobo'ana, manuna Yaubada ni'atu 'iesinuwemi tauna 'ina 'ebeloina 'esasena manuna.

13 Gosemao tuta yauyauna 'alokagutoki Yaubada 'ena, manuna Yaubada 'ina ona ni'atu 'a'ebwa'emi ga 'ena watagwalemi, nigeya 'aene tomota 'idi ona, ta esi Yaubada 'enega. Ona'ai'aila, ona nina Yaubada 'enega, ga waemisena, ta 'ana waiwai ni'atu walotoona. 14 Ta wate miyamwau walobena, nadigega taudi Yesu Keliso 'ana toemisao sena Yudia 'enaya, manuna toekalesiyao nidi 'idi miyamwau silobena taudi 'idi tomotaiyao 'ediyega, nadigega 'omi 'imi miyamwau walobena taumi 'imi tomotaiyao 'ediyega. 15 Manuna taudi me Yudia 'idi bubuna gete 'ida 'Inapwana Yesu siloemwawasina, ta wate lowaenei palopitao siloemwawasidi, ta wate 'abo'ama ni'atu sietalauwalema, 'enega Yaubada geya nuwana taudi, 16 ta 'ima simana 'omi sena yauyauna tomoteninao 'emiya sitootoo be sida 'etobode, manuna geya nuwadi be Yaubada 'i'etoseyemi. 'Enega 'idi to'umalinao sisinabwa 'ai'aila, ta 'ana e'isa nate 'elouya sinabwana Yaubada 'i'ebwa'edi.

Paulo nuwanuwana be 'iayausa limadi

17 Gosegwao, lowa 'apilipili sinemi ga nigeya wate 'ada 'ita limemi, ta ma'etamo nigeya 'anuwanuwa pupulemi, ta 'atootoo waiwai be 'aene 'awawa sabi 'italimami. 18 Ona'ai'aila, 'abo'agu Paulo yatootoo waiwai be 'aene 'awawa be 'aayausa limami, ta yatooyogena, manuna Seitani 'ima 'eda 'igibodena. 19 Ona'ai'aila, 'omi namo manumi ma ima nuwayaina be 'aene tuta nina 'ida 'Inapwana Yesu 'iapwesa limanama, 20 tupu be gwausowala manumi 'ada loba.